DASAR AGAMA ISEULAM

OLEH : SULAIMAN.A.GANI

============================

Meu insya allah, ngoen tuloeng rabbi

Deungoen hai akhi,   u loen  peunyata

Agama iseulam,  beuna taturi

Agama rabbi, yang that kuasa

           

Sideh di langet,  mula phoen jadi

Peutroen  u bumi , ateuh  saidina

Tuhan neupeutroen,  keupada nabi

Meunan hai akhi,  dalam calitra

Deungoen  na tuah,  keunoe neupeuri

Qur’an yang suci,  mula  pertama

Kedua  geukheun,  nyan hadist nabi

Mangat  taturi ,  geutanyoe  dumna

Yang keu lhee  sunnah,  wahai akhi

Yang keu peut lagi,  jimak  ulama

meunyan keuh dasar,  agama  islami

mangat  taturi,  bek  le syoek sangka

Badum pih cocok,  sama seukali

Dalam qur’ani,  bandum geunyata

Untuk meukawen,  taleuk pih meuri

Taleuk rajii,  ngoen taleuk tiga

Fasakh ngoen rujuk,  han  pue  tasudi

But  tungku kazi , meunyang peu nyata

ureueng yang suleit,  deungoen teumaki

hukoem warisi,  deungoen pusaka

Bandum binatang,  sama sekali

Karoeng ngoen wali,  han sabe jeumba

Bandum pih cocok,   sama seukali

Dalam qurani,  bandum geunyata

Hana pat tamah,  han pat kurangi

Aturan rabbi,  han jeut meutuka

Hanjeut  tatuka,  bagah lam hatee

Ban jikheun lise,  le nafsu hawa

Meunyoe jipeugah , le  ureueng kafee

Keupada nabi , jikheun  ban  suka

Han jiteim pateh , kalam  ilahi

Jikheun buet nabi ,geupeuna peuna

 

Meunyoe  bit gata,  hai ureueng kafee

Mantoeng syoek hate,  qur’an mulia

Tacuba peugah , saboeh beulahe

Yang seimbangi,  qur’an mulia

Nibak masanyan,  di ureueng kafee

Peugoet konprensi,  tokoh pendekar

Jimeuhei bandum,  sama seukali

Yang ahli ahli , tokoh panglima

Jikeuneuk reuloeh,  kalam illahi

Hana  ji  asi,  qur’an yang kana

Tapi ka  nyata,  kana  bukeuti

Han ek ji  anti,  qur’an mulia

Malingkan tuhan,  sidroe illahi

Yang ek atasi,  bandum semu

Yang han ek, hanpue ta uji

Malingkan Rabbi, Yang  Maha Kuasa

( Tgk Diyueb Bruek, 14    Januari  2009 )