“ HUKOM EK HAJI “

 OLEH : SULAIMAN, A.GANI

============================

Alhamdulillah, Kalam mulai

Lon pujoe Rabbi, Azawajalla

Yang peutroen Rahmat, keunoe u Bumi

Yang Maha suci, ngoen Maha kaya

Maha peungaseh, Tuhanku  Rabbi

Yang bri raseuki, lat batat dumna

Lhuehnyan seulawuet, keupada Nabi

Utusan Rabbi, ban sigoem Donya

Rasul Pilihan, pang ule  Nabi

Syafaat neubri, Blang padang masya

Sideh Di Mizan, Liwal Ul-Hamdi

Bak ule titi, ka neupreh Hamba

Assalammu’alaikom, Saleum ulon bri

Ayah ngoen Ummi, Tuha ngoen Muda

Samboet saleum lon, Jawaban neubri

Hukom Jih Pakri, meunoe ban rupa

Na Sidroe urueng, Dua  Isteri

U tanoeh Suci, Hajat geuteuka

Ka’bah baitullah, geujak kunjungi

Panggilan haji, hajat  keurija

Geuba ban dua, sinyak puteh di

Akan teutapi, Hansep beulanja

Meugeuba saboeh, sinyak puteh di

Sidroe truek lagi, pakriban cara

Pakriban Hukom, jeunawueb neubri

Izin han jibri, meukon ban dua

Meusalah saboeh, geupeu ek Haji

Hukom jih Pakri, neupeugah cara

Dilon tan muphoem, Hukom ek  Haji

Dua  isteri, saboeh yang geuba

Neutuloeng jawueb, hukom jih pakri

Sidroe Suami, ade  mangat na

( Tgk Diyueb Bruek, 22/06/2013 )

 Jawaban :

Meu insya Allah,  Jawaban lon bri

Hukom Ek  Haji, Peurumoh  dua

Hajat ban dua, geupeu ek  Haji

Akan teutapi, hansep beulaja

Meugeuba saboeh, izin han jibri

Meuna terjadi, lagenyan cara

U atueh gobnyan, wajeb ek  haji

Meuhan ngoen Rabbi, goebnyan meudosa

Langkah yang keuphoen, gobnyan kerjai

Dua Isteri, peusapat sigra

Beuna seupakat, dua isteri

Meusoe ek Haji, kali  pertama

Meunyoe sit meunan, Izin han jibri

Sidroe suami, Beubijaksana

Inoeng yang Tuha, neupeu ek  Haji

Dan neumeujanji, keu Inoeng Muda

Meunyoe Thoen Ukue, Tanyoe Allah bri

Mudah Raseuki, nyan lon ba  gata

Nyan inoeng Muda, gata ek haji

Meunan suami, janji jih  beuna

Meuka neupeugah, seureuta meujanji

Tanyoe ngoe Rabbi, hanle  meudosa

Beuthat han jiten, Izin han jibri

Tapi ngoen Rabbi, ka seupeureuna

Nyan inoeng Tuha, neuba u Haji

Dan neumeujanji, ngoen Muda

Bek seubab inoeng, han jak u haji

Dos ngoen Rabbi, Karna neutunda

Meunan muphoem lon, keu Hukom Haji

Sidroe suami, meu inoeng Dua

Meunyoe na salah, neuperbaiki

Hukom Ek Haji, Tanyoeng Ulama

(Tgk Diyueb Bruek, 22/06/2013 )