“ HIKAYAT SIPLOEH PEUTUAH URUENG MEUGOE BLANG “
====================================================
“ PHOEN NIBAK PO TAMEULAKE “
“ TAPULA BEUTEUPAT WATE “
“ TANOEH BEK MEUBOEH KEUMUDE “
“ BIJEH BEUMEUTEUNTE “
“ IE BEUNA SABE BAK PEREUDE “
“ BAJA LAGE JILAKE “
“ ATUENG NGOEN LUENG BEK MEUBULE “
“ SEUMPROET HAMA MEUNYOE PEUREULE “
“ WATE KEUMEUKOEH BEK PREH DILE “
“ ZAKEUT NGOEN UTANG BEK PAYAH LAKE “
“ PANG ULEE BUET IBADAT,
PANG ULEE HAREUKAT MEUGOE
==========================================
KEUNOENG SIBLAH TABU JARUENG,
KEUNOENG SIKURUENG TABU RATA,
KEUNOENG TUJOEH PADE LAM UMOENG,
KEUNOENG LIMOENG PADE KA DARA,
KEUNOENG LHE PADE KA RHOEH
PADE TAKOEH UJUEN KEUNOENG SA.
“ RINTIHAN PETANI KECIL “ ( By ANNYMOUS )
=======================================
“ Aku ini Sakit
Sementara kalian Berseminar......
Tentang keadaan ku.......
“ Aku ini lapar
Sementara kalian menumpuk numpuk laporan......
Tentang keadaanku.........
“ Aku ini terlantar....
Dan kalian masih melakukan Konfrensi .....
Yang kurang berarti........
Kalian menyelidiki semua yang menjadi kekhawatiranku......
Namun sampai sekarang aku ini tetap “ Sakit, Lapar dan Terlantar “
=================0o0 =============================
A. “ RANUB SIGAPU “
================
Syukur ngoen pujoe, muwoe keu Tuhan
Yang peujeut alam , ban sigoem donya
Seulawuet saleum , akan janjoengan
Pang ule alam , Rasul mustafa
Assalammu’alaikoem,Tangloeng buluen trang
Jaroe loen layang, atueh jeumala
Jaroe loen dua, loen beuot mayang
Ngoen hate seunang, didalam dada
Ranub kuneng oen, tawoe bak meudang
Siblah pinueng krang, rampagoe Hana
Nyoe Ranub sipreik, ngoen boeh pinueng krang
Kirem keu rakan, tanda mulia
Geulantoe uloen bri, kupi sicawan
Rukok kisaran, bak uloen yang na
Gantoe loen jak droe, loen bri utusan
Kirem keu rakan, saboeh Mustika
Samboet rakan droe, saboeh karangan
Keu pertanian, Kisah loen rika
Siploeh peutuah, urueng meugoe blang
Baca hai rakan, kadang meuguna
Siploeh peutuah, Hajat loen peutrang
Keu buah tangan, keu tanda mata
Keu Bungoeng jaroe, gantoe Bingkisan
Geulantoe Badan, Sawue saudara
Gantoe Keujruen Syik, deungoen Keujruen Blang
Dan Penyuluhan, ngoen P3 A
Gantoe PPL, Bri penyuluhan
Bandum Gapoktan, loen kiren Haba
Siploeh peutuah, urueng meugoe blang
Cara pakriban, Mangat sempurna
Jaroe bak langai, mata u peukan
Mangat sipadan, Tamoeng beulanja
Pajan Khanduri, Mulai troen u Blang
Keuneunoeng pajan, wate seumula
Pue bijeh talhoeng, pupuk pakriban
Supaya Aman, han keunoeng bana
Untuk peutani, bacut loen peutrang
Dinas Pertanian, sideh Tingkat sa
Yang mat kendali, sigala pogram
Lhuehnyan hai rakan, bak tingkat dua
Bapak Razali Adami, yang mat pimpinan
Awuek bak gobnyan, Dinas Tingkat sa
Deungoen Pak Fauzi, wakil di Goebnyan
Cukoep seujalan, keurija sama
Neubri Tuhanku, sehat pikiran
Dua uruengnya, neubri seujahtra
Beusapue pakat, beusaboeh pogram
Dinas pertanian, meuhoe tanuek ba
Aceh beumaju, lam pertanian
Rakyat beu aman, Hudep seujahtra
Dak Ta ibadat, tapujoe Tuhan
Geutanyoe seunang, meubrueh bu kana
Ranub sigapu, ohnoe loen karang
Peutuah meugoe blang, ohnoe meumada
Ta lake Doa, lindoeng bak Tuhan
Supaya Aman, Hudep seujahtra
Banda Aceh 11 Nopember 2013-11-04
Pengarang
( SULAIMAN. A. GANI )
B. “SIPLOEH PEUTUAH URUENG MEUGOE BLANG “
==========================================
Allahurabbon, Khalikon Mannan
Yang Gaseh Sayang, keupada Hamba
Yang bri raseuki, yang peuna peutan
Bandum buet Tuhan, yang that Kuasa
Seulawuet Saleum, Atueh janjongan
Pang Ule Alam, Khatam Ambiya
Yang ba Risalah, ban sigoem Alam
Utusan Tuhan, Atueh Rhueng Donya
Assalammua’laikoem,Tangloeng jeumeulang
Jaroe loen layang, loen grak bandua
Loen kirem saleum, dalam keunarang
Keu wareh rakan, Bandum Syedara
Tuha ngoen muda, Inoeng ngoen Agam
Beurangpat saban, Dusoen ngoen Kota
Hajat uloen bri, Saboeh Karangan
Peutuah meublang, Hajat loen rika
Siploeh peutuah, urueng meugoe blang
Cara jih kiban, Mangat sempurna
Visi ngoen Misi, Tamah didalam
Dinas Pertanian, Pogram Keurija
Pemerintah Aceh, yang bri dukungan
Keu Pertanian, pogram lomboi sa
Ka meunyoe Maju, lam pertanian
Rakyat lam Aman, Meubrueh bu kana
Dak ta ibadat, tapujoe Tuhan
Tanyoe ka aman, Hudep Seujahtra
Tajaga Damai, Bekle Meusugang
R.I. deungoen GAM, Kaseb yang ka ka
MoU Hilsingki, beujuet patokan
Saboeh landasan, Aceh Dame ka
Ngoen UUPA, keu Undang Undang
Aceh Darussalam, Aman seujahtra
Tapeugoet Qanun, Nyan Undang Undang,
Untuk turunan, Nyan UUPA
Syariat Iseulam, pasoe u dalam
Supaya Aman, Hudep sentosa
Astaufirullah, ka salah kalam
Meuwet karangan, hoe laen haba
Siploeh peutuah, urueng meugoe blang
Keunan Tariwang, Bak Asai punca
Meu seun seun saboeh, jinoe lon peutrang
Meugoe hai Rakan, loen peugah cara
Mangat le hase, Pade meukuyan
Supaya seunang, Hudep seujahtra
Hase troek zakuet, punoeh beurandang
Peutani seunang, deungoen keluarga
Cara yang keuphoen, jinoe hai rakan
Bah loen ci peutrang, tuloeng bilueng sa
============o0o==============
1. “ PHOEN NIBAK PO TAMEULAKE “
==============================
Buluen limoeng blah, Indah hana ban
Di langet manyang, leumah meucaya
Siploeh peutuah, urueng meugoe blang
Yang phoen hai rakan, pujoe Rabbana
Mayang Meuhayak, pucak blang galang
Gampoeng lheu simpang, kubu Syuhada
Ta meukhanduri, puphoen troen u blang
Adat lagenyan, pusaka Maja
Dicoet geulungku, Syahid di lapan
Di Bineh Jalan, kubu Aulia
Tapuphoen meugoe, tanyoe troen u blang
Keudeh bak Tuhan, Tanyoe meudoa
Gunoeng seulawah, dua meujantang
Saboeh yang Agam, saboeh yang dara
Tanyoe meulake, Ka nibak Tuhan
Wate troen u blang ,Neubri seujahtra
Jipoet angen gle, kaye meuliggang
Ticem teureubang, jiwoe lam guha
Keudeh Nibak Po, Tanyoe harapkan
Hase bri Tuhan, Meulipat ganda
Tajak u tutut, jalan roet geumpang
Taek jeumbatan, lingkue krueng Wayla
Geutanyoe hudep, lam bumoe Tuhan
Susah ngoen seunang, Tuhan neukada
Meugah pade pe, sideh nanggroe jram
Hase meukuyan, jithe u lua
Meunyoe tasyukur, keupada Tuhan
Geubri Tambahan, meulipat ganda
Meu ie Krueng Tangse, ile u geumpang
Na saboeh simpang, ile u Daya
Meutan Tasyukur, keu nikmat Tuhan
Neubri balasan, sabe lam bala
Buraq meunari, atueh gle mayang
Cicem meu ayang, sijudo dua
Hase bak tani, pade meukuyan
Syukur keu Tuhan, Azawajalla
Tajak u garoet, beusoet gampoeng blang
Jalan u geumpang, meuputa puta
Pujoe ngoen Syukur, sit milik Tuhan
Geutanyoe Insan, geuyue meudoa
Khanduri bacut, Wate troen u Blang
Lake bak Tuhan, neukabul Doa
E Ya Tuhanku, Kamoe troen u blang
Bekna Rintangan, beujeuoh bala
Neupeutroen Ujuen, ngatna ie lam blang
Bekna seurangan, pade bak hama
Nyan hama wereng, tikoh pih meunan
Peujueoh rijang, O ya Rabbana
Beutroek ngoen Zakuet, wase meukuyan
Supaya Aman, Hudep seujahtra
Kamoe ibadat, meupujoe Tuhan
Ka dalam aman, meubrueh bu kana
Meunan keuh cara, tanyoe troen Blang
Tapujoe Tuhan, bek sagai lupa
Pusaka maja, indatu nekyang
Meukhanduri blang, Jamuen koen kana
===============o0o=============
2.“ TAPULA BEUTEUPAT WATE “
===========================
Gunoeng sibanyak, pucak lam awan
Antara medan , deungoen brastagi
Narit mustahak, sikrak loen bayang
Peutuah troen u blang, Hajat loen Rawi
Aneuk rimueng bueh, kalheuh lam kawan
Aneuk daruet blang , meuduroe gaki
Tapham keuneunoeng, pajan troen blang
Koen beurangkajan, juet saban sakri
Taluem kutika, Pajan troen u blang
Jinoe hai rakan, ka dua kali
Ngoen Pemerintah, harus seujalan
Peurintah troen u blang, SK Bupati
Pajan peugleh lueng, tanyoe troen u blang
Rapat Gapoktan, pajan mulai
Pajan lhoeng bijeh, wate beumeujan
Rapat keujruen blang, pajan khanduri
Mupue Varietas, meupakat rijang
Mangat seuragam, tanyoe mulai
Ngat sigoe panen, wate luah blang
Peulhueh Binatang, hanale sangsi
Meunyoe han sigoe, tanyoe troen u blang
Le that halangan, akan terjadi
Meuyang phoen bah ie, sampoe bicah prang
Hanseb dalam blang, han saban bagi
Kedua hama, deungan Binatang
Wereng diseurang, han ek atasi
Miriek ngoen tuloe, han ek tapawang
Hana seuragam, han ek kendali
Yang keulhee Tikoh, ka wahai rakan
Dalam atueng blang, Hansoe keundali
Meu anuek cucoe, sinan dalam blang
Pajoeh tanaman, Kanan ngoen kiri
Han putoeh Siklus, tikoh hai rakan
Seuban makanan, sabe tersaji
Habeh umoengnyoe, Tanle makanan
Siblah truek rakan, matoeng rhoeh mari
Meunan sit hama, Siklus dalam blang
Pade diseurang, han ek keundali
Ta somproet uroe, troek laen malam
Meunyoe troen u blang, nyan saban sakri
Oleh seubabnyan, bacut loen peusan
Keu bandum rakan, kawoem peutani
Neumeuduek pakat, pajan troen u blang
Mangat seuragam, ek takeundali
Meunyoe koen meunan, cara troen u blang
Le that hambatan, akan terjadi
Tikoh ngoen Hama, pade diseurang
Kadang meujan jan, banjir terjadi
Le Urueng Tuha, jamuen geupeusan
Keuneunoeng rakan, yue peulajari
Pajan mulai, tanyoe troen u blang
Jeuoh halangan, Tuhanku neubri
Meukeunoeng tujoeh, pade dalam blang
Limoeng hai rakan, Pade rhoeh mari
Wate keunoeng lhe, pade rhoeh lam blang
Takoeh hai rakan, ujuen keunoeng sa
===============o0o========
3“ TANOEH BEK MEUBOEH KEUMUDE “
===============================
Keude meureudu, tamoeng u dalam
Roet simpang matang, jak samalanga
Siploeh peutuah, urueng meugoe blang
Jinoe loen peutrang, deungoe beurata
Kulet boeh mangeh, peureuseh arang
Asoe di dalam, mameh ban saka
Cara yang keulhe, bacut peutrang
Tanoeh hai rakan, olah sempurna
Takroek ngoen moto, Tayue meu ue Blang
Atau hai Rakan, cangkoe le gata
Lumoe ngoen keubue, meunyan pih saban
Tanoeh hai rakan, beubroek meurata
Tanoeh tapeubroek, ngoen ie tareumdam
Sinan ta tinggai, meupadum lama
Tanda jih broek, jiteubiet ek glang
Tabalek rijang, cacah le gata
Tanoeh ta balek, mangat broek rijang
Meubek na tinggai, meucak yang gasa
Tanoeh beuhaloeh, licen meunisan
Nalueng bek tinggai, cacah le gata
Wate seumula, mangat hana ban
Tanoeh hai rakan, bandum ka rata
Dak unsur hara, pupuk dalam blang
Bandum hai rakan, meubagi rata
Mudah di hisap, oleh tanaman
Poleh pih rijang, hijoe peunula
Wate geuruwueh, meu umpoe diblang
Mangat hanaban, nalueng pih hana
Dak taboeh baja, meubagi pih tan
Nalueng hai rakan, seubab ka hana
Bandum keu pade, baja hai rakan
Maka seubabnyan, hase meugunca
Meunyan faedah, kalhueh loen bayang
Tanoeh hai rakan, olah seumpurna
Ban boeh keumude, meubek hai rakan
Tameu ue diblang , meucak cak gasa
Tanoeh beuhaloeh, lage beulacan
Ngoen nalueng pih tan, meu sion hana
Hase meuguni, meugunca kuyan
Meunyoe lagenyan, tanyoe keurija
===============o0o=========
4“ BIJEH BEUMEUTEUNTE “
=======================
Atueh gle lawueng, Urueng meuladang
Atueh gle kandang, urueng meurusa
Siploeh peutuah, urueng meugoe blang
Keupuet hai rakan, Bijeh Tamita
Atueh gle jeudah, Buraq meu ayang
Lam pucoek pisang, ulat meudoda
Bijeh tapileh , bek sembarangan
Bijeh pilihan, yang mutu jih na
Meunyoe goet bijeh, tanoem hai rakan
Hase pih meunan, meukuyan gunca
Misue bak urueng, nyan keuturunan
Harus tapandang, silsilah bangsa
Bek coek meulinte, neupileh pih tan
Ohna turunan, juet keubeulaga
Meunan sit bijeh, nibak tanaman
Beuna pilihan, meugoet ngoen hana
Tanda bijeh goet, bacut loen peutrang
Na keterangan, label keu tanda
U dalam kantoeng, jipasoe keunan
Jiboeh deungoen nan, Produksen Nama
Nyan BPSB, Kanto geupuenan
Keu Peungawasan, Bijeh di gata
Nyan kanto Bijeh, bri peungawasan
Yang bri jaminan, beutoi ngoen hana
Kalhueh di uji, Mutu bijeh nyan
Meugoet deungoen han, timoeh ngoen hana
Deungoen Varietas, diseuboet sinan
Miseu Ciherang, deungoen Mikongga
I.R . nam ploeh puet, Inpari lapan
Meumacam macam, troek Atomita
Meumacam bagoe, pade jiboeh nan
Nyan persilangan, buet pemulia
Ngoen Daya timoeh, diseuboet sinan
Bak keterangan , CVL pih na
Bersertifikat, diseuboet ngoen nan
Stempel Rakan, jiboeh keu tanda
Meuka na label, pasoe u dalam
Kana jaminan, Bijeh neupula
Bijeh bermutu, koen sembarangan
Bijeh pilihan, kalhueh pareksa
Meutan tapileh , Bijeh hai rakan
Meuhase jih tan, juet sia sia
Jigoeb dimeugoe, hase meukuyan
Tanyoe hai rakan, Han troek sigunca
Oleh seubabnyan, geutanyoe Rakan
Peuteunte Rijang, Bijeh neupula
Neupula pade, neumeugoe di blang
Neumita rijang, Bijeh lumboi sa
Yang le Produksi, hase meukuyan
Yangna jaminan, Label jih kana
Bek rugoe payah, Neumeugoe di blang
Meuhase jih tan, wate takira
Jigoeb troek Zakuet, Meugoe sigantang
Pakoen tanyoe tan, meugoe sihekta
Karena bijeh, hana pilihan
Meugoet deungoen tan, peuduli hana
===============0O0=========
5“ IE BEUNA SABE BAK PEUREUDE “
==============================
Dile Meureudu, Wilayah Sigli
Dudoe dibagi, juet pidie jaya
Siploeh peutuah, urueng meutani
Jinoe loen Rawi, seun seun sibanja
Pucoek krueng daroy, lam gle mata ie
Ule meusundi, lam tanam Raja
Tapula pade, sabe beuna ie
Ta koordinasi, ngoen P3 A
Kuala langsa, pabrek teurasi
Kuala idi , na pabrek sira
Rapat Keujruen Blang , deungoen peutani
Bahas teutang ie, bek sampe hana
Dengon keujruen blang ,keulompok Tani
Keujruen Syik Lagi, dengan Anggota
Ngoen Dinas PU, Mat Irigasi
Meu ie yue bagi, Mangat meurata
Mangat meugoe blang, na Irigasi
Tinggai yue bagi, keurija sama
Maka peureule, nyan Koordinasi
Supaya na ie, Ade meurata
Takoeh bak mane, tarah keu jingki
Alee bak giri, leusoeng bak jeumpa
Meunyoe na ujuen, Rahmat Tuhan bri
Seunang peutani. Ie lam blang kana
Tampung lam waduk, lhuehnyan di bagi
Supaya na ie, wate khueng raya
Mangat bek susah, urueng meutani
Sabe yangna ie, saban kutika
Tatanoem pade, sabe beuna ie
Peureude leupie, Timoeh meurata
Deungoen goet timoeh, Rahmat Tuhan bri
Hase meuguni, meukuyan gunca
Meunyan faedah, saboeh loen rawi
Sabe beuna ie, dalam peunula
Nibak peureude, sabe beuna ie
Syarat meuseuti, hanjuet han hana
Meunyoe koen meunan, cara meutani
Sayang han sakri, juet sia sia
Jinoe keu Baja, bacut Tarawi
Deungoe hai akhi, pakriban cara
================o0o==========
6“ BAJA LAGE JILAKE “
=====================
Atueh gle jeudah, tiwah meunari
Atueh gle jati , buraq jitafa
Siploeh peutuah, Urueng meutani
Jinoe loen rawi, keu suai baja
Aneuk tuloe phoe , bek tapeh aweueh
Aneuk guda lheueh, bek tapoeh lawa
Cara ta meugoe , bek asai kalhueh
Beuna tatuwueh, ngoen taboeh baja
Baja yang taboeh, lage jilake
Beuteupat wate, bek jan yang hawa
Taboeh baja on, nibak phoen dile
Nibak peureude, sipruek beurata
Puleh peunula, baja di lake
Nyan baroe wate, taboeh NPK
Jatah sigoe truek, meunyoe di lake
Mangat geunab lhe, ka sempureuna
Kadang seb dua, hana payah lhe
Kiban jilake, kondisi yang na
Kon ban galak droe, tanyoe peureule
Seureuta wate, kon ban yang hawa
Yoeh goeh meu umpoe, nyang taboeh dile
Mangat meuseube, tanoeh ngoen baja
Wate tabloeh bloeh, nibak peureude
Nalueng taseube, ngat juet keu baja
Nalueng ta eumpoe, sigra teseube
Bandum peureule, bek boeh u lua
Ngoen bule Atueng, pih meunan lage
Bandum taseube, geunantoe Baja
Bacut loen peugah, yang that peureule
Keutika wate, tanyoe boeh baja
Meu ie hanjuet thoe, Nibak peureude
Cukoep peureule, peularoet baja
Bek boeh dalam thoe, ngoen salah wate
Hana peureule, juet sia sia
Ie licah licah, nibak peureude
Hana peureule, lage ie raya
Meunyoe le that ie, nibak peureude
Baja di bame, baplueng u lua
Meunyan keuh seubab, hana peureule
Nibak peureude, lage ie raya
Seureuta taboeh, ube peureule
Kiban jilake, le suasana
Bek juet mubazir, hana peureule
Yang peunteng wate, beugoet neujaga
=================o0o==========
7“ ATUENG NGOEN LUENG BEK MEUBULE “
========================================
Lincah coet uroe, boeh panjoe pateun
Asam boeh kiyun, campli ngoen sira
Syarat tameugoe, tapeugoet Atueng
Tapeugleh ngoen lueng, mangat sempurna
Kareuna umbak, meusawak jareng
Kareuna puteing , meusawak bara
Tameugoe di blang, geutanyoe kayem
Tapi han tatem, bak tapeulara
Bak ateung teungoeh , sinyak seumeusek
Bak bineh parek , timoeh drang jawa
Atueng deungoen lueng, seureuta parek
Pakoen han tasek, bek juet bencana
Gotong royoeng lueng, Atueng ngoen parek
Meu ie tapeu ek , ngat bek meusangga
Seureuta Tikoh, Atueng di kurek
Meunyoe ka tasek, jiplueng u lua
Atueng tabangkang, laen tapeu ek
Nalueng tatarek, peugleh beurata
Peugleh Atueng lueng, seureuta parek
Tikoh jimudek, ho laen bungka
Meu ie dalam blang, wate tapue ek
Hanle lam parek, teubiet u lua
Kareuna Atueng, kabeh takurek
Laen ta peu ek, busyoe hanle na
Seureuta tikoh, habeh jumudek
Hanle lam parek, dimeudiwana
Tanle lam Atueng, umpueng dikurek
Ka habeh tasek, peugleh le gata
Tikoh hana le, Atueng ngoen parek
Pade Cut Adek, gangguan hana
Hanle soe pajoeh, tikoh ka mudek
Han pue cut adek, racon ngoen tuba
Peugle Atueng lueng, ka deungoen parek
Produksi ji ek, Meukuyan gunca
Ta meugoe seunang, produksi ji ek
Karna gleh parek, gangguan hana
Meunyoe hana gleh, atueng ngoen parek
Tikoeh han mudek, dimeudiwana
Meu anoek cucoe, sinan lam parek
Atueng di kurek, pajoeh peunula
Meunyoe tapeugleh, Atueng ngoen parek
Tikoeh ka mudek, ka gadoeh hama
Hanle soe pajoeh, pade cut adek
Hase jih baek, meukurueng hana
Meunyoe goet pade, hase pih ji ek
Seunang cut adek, deungoen keluarga
Meunyang keuh seubab, atueng geuyue sek
Yue peugleh parek, tikoeh ngat bek na
================o0o==========
8“ SEUMPROET HAMA MEUNYOE PEUREULE “
======================================
Ale bak muroeng, leusoeng bak jambe
Sinyak toep sage, diyuep seulasa
Ta Seumproet hama, meunyoe peureule
Kiban jilake, pue jenis hama
Musem keunoeng sa, masak boeh kayee
Musem keunoeng lhee, ie raya teuka
Meu subur pade, hijoe peureude
Hana peureule, ta seumproet hama
Meunyoe ka keunoeng, pade ka laye
Seumproet peureule, kendali hama
Wereng ngoen geusoeng, seumprot peureule
Hanjuet preh dile, meunyoe nyan hama
Hanjuet meutanggoeh, kutika wate
Hanjuet preh dile, dang na beulanja
Si uroe tapreh, pade ka laye
Habeh peureude, jikab le bana
Pajoeh le geusoeng, wereng beulage
Hana jan tathee, siat seureupha
Habek di pajoeh, jikab peureude
Pade ka laye, mirah meuhampa
Pade ka puso, tinggai peureude
Hana le lage , meu asoe hana
Oleh seubabnyan, seumproet peureule
Bek jipeulage, pade le hama
Bacut loen peugah, seumproet peureule
Teutapi wate , beugoet neu jaga
Neuseumproet beungoeh, poh tujoeh wate
Bek seumprot poh lhe, meujeulang Asa
Hana efektif, lagenyan lage
Dalam peureude, ka jiloep hama
Hana jiteubiet, dalam peureude
Meunyoe ka poeh lhe, jimeusoem hama
Dua boeh pade, di buka babah
Meunyoe poeh siblah, taseumproet hama
Ka tinggai racoen, sinan meukeubah
Di dalam babah, hanle keulua
Di dalam pade, yang geukhuen gabah
Sinan meukeubah, nyan racoen hama
Tapajoeh keudroe, Racoen takeubah
Rakan meutuah, kiban bahaya
Meunyan keu seubab, Rakan meutuah
Kalhueh loen peugah, dua lhe banja
Tanseumproet hana, wate beubagah
Sigoeh loem bicah, jiteubiet paja
Meunyoe ka teulat, rakan meutuah
Ubiet Faedah, rayoek bahaya
Meu rayoek rugoe, deungoen faedah
Ka susah payah, mamfaat hana
=========o0o===============
9“ WATE KEUMEUKOEH BEK PREH DILE “
===================================
Takoeh bak mane, keu ale neuba
Leusoeng jeumpa , jeungki bak meudang
Wate keumeukoeh , oh troek kutika
Piasan Raya, teungoeh luah blang
Jimeuloet siwah , ngoen ciceng pala
Rimueng ngoen singa, meukuran kuran
Oh masak pade, kuneng meuhampa
Hanjuet tatunda, takoeh beurijang
Meuteulat takoeh, luroeh meukeuba
Rugoe meubura, timoeh dalam blang
Hase meukurueng, wahe saudara
Wate takira, luroeh bak neubai
Luroeh bak takoeh, Wate keurija
Seuneubai raya, luroeh meukarang
Luroeh bak tangke, ka leupah tuha
Han pue takira, Rugoe koen wayang
Barokoen tapreh, tapeulihara
Taboeh ngoen baja, subur tanaman
Tajaga ngoen ie, mangat sempurna
Ta seumproet hama, bekna gangguan
Wate keumeukoeh, meubek tatunda
Rugoe meubura, ka wahai rakan
Meunyoe han takoeh, meutanggoeh lusa
Luroeh meukeuba , pade dalam blang
Di Atueh atueng, Tapeuduek Neubai,
Dia atueh jeundrang, luroeh meukeuba
Padumna rugoe, tanyoe hai rakan
Padumna s ayang, wate takira
Hase meukurueng , luroeh meukeuba
Ka leupah tuha, bak tangke leukang
Meunyoe ka reubah, han pue takira
Bak ta useuha, susah hana ban
Oh wate takoeh, susah keurija
Seuneubai raya, bak tapeutimang
Di sinan liroeh, jatoeh meukeuba
Pade sigunca, tinggai peut gantang
Seureuta wasiet, bak urueng tuha
Atra yang kana, geuyue coek rijng
Bek gadoeh laloe, seutoet yang hana
Rugoe meubura, oh geucoek pulang
Pade geuyue koeh, oh troeh kutika
Yue bayue sigra, zakuet ngoen untang
Bekle meutanggoeh, singoeh ngoen lusa
Bek juet keu Dosa, Tanyoe ngoen Tuhan
Ka meunyoe meunan, tanyoe keurija
Meulipat ganda, neubri le Tuhan
Tuhan peujeuoh, tanyoe ngoen bala
Seubab kareuna, zakuet ngoen utang
Rawi keumeukoh, ohnoe meumada
Tasamboeng sigra, Zakuet ngoen utang
Siploeh peutuah, Rab tamat rika
Uloen calitra, cara meugoe blang
10“ ZAKEUT NGOEN UTANG BEK PAYAH LAKE “
========================================
=========================================
Hukoem Allah dalam sunnah, ngoen fireuman
Hukoen raja lam acara, undang undang
Hukoem syara`k ka meujamak , kanun reusam
Hukoem Adat laen teumpat, laen macam
=========================================
Tajak u rigah , singgah u calang
Tamoeng lam peukan, tajak beulanja
Siploeh peutuah, urueng meugoe blang
Zakuet ngoen utang , jinoe tarika
Bawang bineh gle, meuputie karang
Bawang bineh blang, meuputie tangke
Ban na raseuki, neubri le Tuhan
Zakuet ngoen utang, jak bayue sare
Rame dalam gle , geutajoek kacang
Rame dalam blang, urueng seumula
Wate na hase, tameugoe di blang
Zakuet ngoen utang, jitungge bek le
Jak bayue zakuet, ngat glah ngoen Tuhan
Jak bayue Utang, meusangkoet bek le
Meusangkoet Zakeut, Dosa ngoen Tuhan
Meusangkoet Utang, peucaya hanle
Meuna Raseuki, Neubri le Tuhan
Zakuet ngoen utang, Jak bayue saree
Bek payah tungge, zakuet ngoen utang
Dosa ngoen Tuhan, Raya bukoen le
Meunyoe na leubeh, Zakuet ngoen utang
U haji rijang, beurangkat sare
Beutroek ta sawue, Kubu janjongan
Makbul di sinan, teumpat meudoa
Sideh di Raudah , Mesjidil Haram
Oh lhueh seumbahyang, Sinan meudoa
Dosa neu ampoen, tanyoe le Tuhan
Makbul disinan, Tanyoe meudoa
Meudoa keudroe, urueng syik lhuehnyan
Lake Amponan, sigala dosa
Lhuehnyan keu Aceh, Neubri beu Aman
Bekle meusugang, sabe syedara
Neucoek keu bulueng, neutueng keu peusan
Wasiet peuneusan , Haba meuguna
Kadang Awai loen, yang susoen Nazam
Meuhadap Tuhan, meuninggai Donya
Neutuen peunawa, haba loen peusan
Juet keu amalan, Akhirat donya
Juet keu Ibadah, neutueng le Tuhan
Sideh neupulang, Blang padang masya
================o0o=========
C. SALEUM PEUNUTOEP
=====================
Beureukat mekkah, ka`bah baitullah
Beureukat syiah , alem ulama
Dengon Izin Po, kudrah iradah
Siploeh peutuah, ka tamat rika
Gunoeng gle ulue, Bak cue seulawah
Lam panah leungah, bak cue lam teuba
Ngoen Rahman Rahim, geunaseh Allah
Siploeh peutuah, kalhueh loen rika
Pucoek Krueng jeunib, bate meusarah
Pucoek krueng pandrah, jimudek buya
Neubri Tuhanku, Rahmat neutamah
Siploeh petuah, Mangat meuguna
Bukoen le sayang, keu minyeuk simplah
Meupliek dalam klah, karoe u lua
Keu kawoem tani, kalhueh loen peugah
Siploeh peutuah, cara keurija
Pucoek krueng aceh, lam gle seulawah
Pucoek krueng sarah, meuputa-puta
Meunyoe neupubuet, lage loen peugah
Meu Insya Allah, wase Mengunca
Hase troek Zakuet , neubri le Allah
Rahamh neutamah, Hudep seujahtra
Tanyoe ngoen Tuhan, pih hana salah
Dalam ibadah, taubat Nasuha
Raseuki neubri, Tanyoe le Allah
Siploeh peutuah, ka ta usaha
Kabeh iktiyue, ngoen ta seuleuah
Teuseurah Allah, geubri ngoen hana
Langkah Raseuki, mawoet geupeugah
Lam jaroe Allah, kada ngoen qadha
Tugah iktiyue, Rakan meutuah
Siploeh peutuah, beuneutem kerja
Tugas di uloen, kalhueh loen peugah
Jinoe terserah, pateh ngoen hana
Terserah bak droe, ummi ngoen Ayah
Siploeh peutuah, kalhueh loen rika
Juet keu ibadat, haba loen peugah
Neutueng le Allah, peuneuboeh Dosa
Blang padang masya, sideh neubalah
Syuruga Allah , pintoe Neubuka
Sulaiman.Gani, Yang rawi kisah
Loen lake meuah, kadang na gasa
Meunyoe na cupa , peubeutoi bagah
Bek juet keu salah, dudoe Meudosa
Neumaklum keudroe, rakan meutuah
Tuleh naseukah, goeh loem biasa
Hana loen jak buet, deungoen kuliah
Hana bak dayah, deungoen sikula
Baro loen ci ci, tuleh naseukah
Rakan meutuah, baro loen coba
Baroe meureunoe, haba loen kisah
Rakan meutuah, bukoen pujangga
Saleum peuneutoep, ohnoe loen peugah
Neubri le Allah, ka sampureuna
Meunyoe na umu , Tuhan neukeubah
Yang laen kisah, geutanyoe Rika
==================0o0=======
0 komentar:
Posting Komentar