Oleh : SULAIMAN. A.GANI
==============================
Alhamdulillah, loen pujoe Rabbi
Yang Maha Suci, deungoen Kuasa
Yang peuna peutan, yang bri raseki
Bandum buet Rabbi, Azawajalla
Ulat lam bate, soe bri raseuki
Ulat lam campli, pakoen han lia
Ngoen rahman rahim, Sit sidroe Rabbi
Lat batat geubri, Hudep lam donya
Seulawuet saleum, akan Rasuli
Pang Ule Nabi, Khatam Ambiya
Yang bri syafaat, bak ule titi
Di Mizan Rabbi, Blang padang masya
Assalammua’laikom, saleum uloen bri
Ayah ngoen ummi, Tuha ngoen muda
Hajat loen peugah, Asai Meusuci
Imum Nawawi, yang po calitra
Asai phoen Wudhuk, cara meusuci
Imum Nawawi, meunoe calitra
Adam ngoen Hawa, yoeh pajoeh kuldi
Larangan Rabbi, dalam syuruga
Syetan didaya, yue pajoeh kuldi
Leuzat han sakri, jipeugah rasa
Adam ngoen Hawa, ka keunoeng taki
Pajoeh boeh kuldi, syetan peudaya
Tuhan peurintah, nibak jibra i
Bak reukueng nabi, sinan yue sangga
Supaya lam pruet, bek leupah kuldi
Nyan keuh bukeuti, Haleukom gata
Tuan ti Hawa, neupajoeh kuldi
Leupah hai akhi, syetan peudaya
Katroek dalam pruet, jitamoeng kuldi
Nyankeuh bukeuti, boeh puyu dara
Tuan ti Hawa, ciret Tuhan bri
Syuruga Rabbi, kuto le sigra
Adam ngoen Hawa, bak gara kuldi
Peurintah Rabbi, peutroen u Donya
Jazirah Arab, neupeutroen Nabi
Jazirah Hindi, Tuan ti Hawa
Peutroen meupisah, Hawa ngoen Nabi
Saleng meucari, meuteume hana
Dodoe meureumpok, Hawa ngoen Nabi
Khendak Ilahi, sidroe yang Esa
Bak saboeh padang, Luah han sakri
Disinan Nabi, Meuteume Hawa
Padang Arafah, Bak wukuf Haji
Meuteme Nabi, ngoen siti Hawa
Makna Arafah, loen boeh areuti
Pertemuan hai Akhi, Tempat berjumpa
Adam ngoen Hawa, taubat bak Rabbi
Pajoeh boeh kuldi, Syetan Peudaya
Sigoloem taubat, neupujoe Rabbi
Adam Meusuci, mula pertama
Adam Rhah jaroe, geupoet boeh kuldi
Adam Rhah Gaki, seubab meusapra* ( Berjalan untuk memetik kuldi )
Adam Rhah Hidoeng, seubab geucoem bee
Adam Rhah ule, Teupeh daunnya
Adam Rhah babah, seubab geupajoeh
Bak puyueng geuboeh, geudeungoe daya* ( Mendengar tipuan syetan)
Meunyan Awai phone, tueng ie seumbahyang
Hawa ngoen Adam, Bak Wate Faja
Sinan Awai phone, Asai meusuci
Seureuta lagi, Wudhuk pertama
Bak Nabi Adam, Asai meusuci
Imum Nawawi, meunan Calitra
Meuka keuh habeh, Haba loen Rawi
Asai meusuci, uloen Calitra
Yang po Riwayat, Imum Nawawi
Sulaiman,Gani, yang susoen rika
Aneuk miet mirah, yang susoen Rawi
Hana mengaji, ngoen jak sikula
Meunyoe na salah, neuperbaiki
Keudeh bak Rabbi, Ampon lon pinta
( Tgk Diyueb Bruek, 25 Nopember 2013 )
0 komentar:
Posting Komentar