HUKOEM KOEH JAROE

Oleh    :   SULAIMAN. A.GANI.

==================================

ALHAMDULILLAH,  ALLAH LOEN PUJOE

YANG PO ALAMNYOE, BAN SIGOEM DONYA

SEULAWEUT SALEUM, OH LHEUHNYAN DUDOE

RASUL GEUTANYOE, KHATAM AMBIA

SALAM A`LAIKOEM, KAWOEM SINAROE

DUA BLAH JAROE, ATEUH JEUMALA

SAMBOET SALEUM LOEN, JEUOH DEUNGAN TOE

BANDUM SINAROE, TUHA NGOEN MUDA

HAJAT LOEN PEUGAH, QANUN KOEH JAROE

KROPSI HAI ADOE,  GEUHUKOEM SAMA

HUKOEM ISEULAM, ACEH LHE SAGOE

BUKOEN HAI ADOE, GEUPEUNA-PEUNA

BUKA QURU`AN, NEUBACA KEUDROE

PAKRIBAN BAGOE, HAREUTOE MAKNA

LAM AL-MAIDAH, HUKOEM KOEH JAROE

LHE LAPAN ADOE, AYAT NEUBACA

HUKOEM PANCURI,GEUYUE KOEH JAROE

AGAM NGOEN BINOE, GEHUKOEM SAMA

NGAT BEK MEUGISA, BAK BUET YANG MEUNOE

NGAT AMAN NANGGROE, BEK HARU HARA

SOE HAN SEUTUJU, HUKOEM KOEH JAROE

TEUBIET LAM BUMOE, ALLAH TA A`LA

PEURINTAH TUHAN MEUNAN ,HARUETOE

KOEN BUET GEUTANYOE, GEURIKA RIKA

SEUBAB PANCURI, HUKOEM KOEH JAROE

BEK DALAM NANGGROE, JEUT MALAPETAKA

HAN AMAN RUMOEH, MALAM NGOEN UROE

RATA JEUT SAGOE, HARUS TAJAGA

SOE HANA SEUNANG, HUKOEM KOEH JAROE

TEUBIET LAM NANGGROE, ACEH MULIA

SEURAMOE MEUKAH, BEK JAK PEUKASYOE

BEK BAN GALAK DROE, GATA KEURIJA

RANCANGAN QANUN, HUKOEM KOEH JAROE

DEUNGOE HAI ADOE, SISEUN SIBANJA

MEUNYOE NEU IZIN, LE TUHAN SIDROE

QANUN KOEH JAROE, KARAP SEUPURNA