“ HANA IKEULAH “

   Oleh : Tgk Diyueb Bruek

===================================

Meukru seumangat, rahmat meukatoe
Sit Tuhan sidroe, Qada ngoen kada
Ka nasib Aceh, lagenyoe Bagoe
Seubab salah droe, Ikeulah hana

Tanyoe berjuang, meuhat keu pruet Droe
Keu Tuhan sidroe, tanyoe talupa
Sumpah ngoen janji, biat saboeh roe
Bandum ka tuwoe, kale hareuta

Meutinggai tapreh. Kutoek nibak po
Meukalhueh sigoe, Tsunami teuka
Tapreh geupeulham, Aceh lhe sagoe
Jiloep lam bumoe, seureutoeh deupa

Kareuna sumpah, biat saboeh roe
Janji geutanyoe, ngoen Tuhan Esa
Jinoe meubalek, ka laen bagoe
jinoe ka tuwoe, Sumpah seutia

Dalam meuseujid, Quran bak jaroe
Sumpah geutanyoe, kon gura gura
Ngoen nama Tuhan, Sumpah geutanyoe
lagi hai adoe, ie seumbahyang pih na

limoeng ijabah, sumpah geutanyoe
Mesjid hai adoe, ijabah pertama
Dua Quran, tamah bak jaroe
Keu lhe hai adoe, ie seumbahyang pih na

Kata Billahi, keupuet hai adoe
limoeng tamuproe, saksi ulama
Maka nyan seubab, Aceh lagenyoe
le Tuhan sidroe, hana geuridha

Tapreh troen kutoek, bak Tuhan Sidroe
Seubab geutanyoe, Sumpah ka lupa
Kadang jitamoeng, Aceh lam bumoe
Kadang hai adoe, ie raya teuka

Puteng beuliong, geupeutroen keunoe
Geulungkop Bumoe, pih mungke saja
Kareuna sumpah, han jithuen bumoe
Seubah Acehnyoe, Tanoeh Aulia

Takalon dali, Bukeuti jinoe
Sabe keudroe droe, juet prang saudara
Fitnah meufitnah, keudeh ngoen keunoe
Sabe keudroe droe. PA ,PNA

Tatamah MP, Gam Bit lom dudoe
Ban puet boh bagoe, ka sama saja
ka maseng maseng, peugah beutoi droe
Maka lagenyoe, Aceh Tarasa

( Tgk Diyueb Bruek 12/05/2012 )

Tamah Bacut :

============

Keu Asoe Pruet
=================
Seun seun bacut, Meukeusud karab meuhase
Jipreh Dang dang Teunguet, Lam luwue cuet dikoeh bace
Rakyat Aceh Kabeh Teunguet, Ka jipeunguet le Paket C
Anggota Dewan That Peuracuet, ka jipeunguet rakyat sabe

Peugoet Qanun pih juet hanjuet, ka meucuet cuet bungoeng pake
Aspirasi yang bagah juet, na meukeusud utoeng sabe
Wate rapat sabe teunguet, oh teukeujoet urueng tanle
Khuen seutuju sira teunguet, rakyat ubuet tansoe pike

Pike keudroe keu asoe pruet, soe tapeunguet mangat sabe
Dua ribe peut blah peugah bacut, bek jipeuguet tanyoe sabe
Pileh keudroe soe yang meuhuet, bek jipeuguet janji sabe
Kalon urueng jujur bacut, bek disukuet kropsi sabe

Mulia langai wate musem blang, mulia empang oeh taboeh pade
Mulia rakyat wate musem prang, lheh nyan lage glang bak mata kawe
Peubloe pue yg na di tgk rakyat, geujak tueng intat som dalam awe
Oeh ban kadame tan le teuingat, laloe ngon pangkat dan moto CRVe

Laloe ngoen putroe siloep meujungkat, keu tgk rakyat hana soe pike
Geu eh lam geudoeng hudep that mangat, di tgk rakyat ie mata ile...
Meunan keuh bagoe jinoe peujabat, lhueh ta angkat pile teuh saree
Nasib rakyat tan soe ingat, lam meularat karab mate

Peugoet rumoeh droe lhe peut tingkat, Rumoeh rakyat han soe pike
Rumoeh dua pha han soe ingat, ka meujungkat binteh tan le
Buboeng tireh tan ngoen peudap, bak geuharap janji sabe
Dak na jibri brueh meu ulat, nyan pih rakyat payah meupake

Peugah JKA pree meu ubat, peut buluen had tapreh Antree
Mate keudroe tungku rakyat, bak preh ubat janji sabe
Sabe rakyat lam meukarat, han soe ingat han soe pike

====================================================