“Rasia Lumpoe Urueng Mumang “

   Dari  :Sulaiman.A.Gani

=====================================

Alhamdulillah , Allah loen pujoe
Yang  Po  Alamnyoe, langet ngoen donya

Yang bri Raseki, Bandum Geutanyoe

Di dalam bumoe, lat  batat dumna

Seulawuet  saleum, ohlhuehnyan  dudoe
Rasul  geutanyoe, khatam Ambiya

Yang bri  syafaat, Bandum geutanyoe

Oh uroe  dudoe, blang padang  masya

Assalammu’alaikom, Rahmat meukatoe

Uloen peusigoe, Bandum loen sapa

Tuha  ngoen Muda, Agam  ngoen binoe

Saleum bak loennyoe, yang karang  rika

Keu cek Medya, pih hana  tuwoe

Uloen peusigoe, ngoen syeh min cakra

Bandum  kru TV, tugas  malamnyoe

Saleum bak kamoe, Bandum Permirsa

Neubri Tuhanku, hajat beusampoe
Rasia lumpoe, hajat loen buka
Nibak lon eh eh, bak saboeh uroe
Leumah lampoe, saboeh rasia

Aleh  pue takbi,  Rasia lumpoe
Allah peusampoe, geujoek keu hamba
Loen  lumpoe Aceh, karab seureuloe
Sabe keudroe droe, jeut prang saudara

Kareuna sumpah, Biat saboeh roe
Jinoe ka tuwoe, kale beulanja
Dak  aneuk yatim, hanle soe pakoe
Hanle soe hiroe, darah syuhada

Adak  TNA , pih meunan bagoe
Hana soe le  pakoe, jibri keurija
Janda ngoen pateng,  pih tan soe pakoe
Jinoe ka laloe, atoe duek raja

Miseu DPR , bacut lon muproe
Ka laloe keudroe, mita beulanja
Dana Aspirasi, peuduek juet sagoe
Yang peuteng keudroe, tamoeng beulaja

 

Sampoe juet pake, sabe keudroe droe
Seurambi tiep uroe , neucuba baca
Gugat meugugat, peugah beutoi droe
Tanle soe pakoe, rakyat jeulata

Yoeh masa lam gle, mantoeng duek ngoen troe
Mantoeng geutanyoe, sapue bahasa
Jinoe ka aman, ka maseng keudroe
Sumpah saboeh roe, bandum ka lupa

Bak  pemerintah , hanjeut  peutoe droe
Meupakoen jinoe, lake duek raja

Kajuet Bupati, Rata juet sagoe

Han pue tamuproe, di  DPRA

Tapi   di Rakyat, Mantoeng kab  jaroe

Padahai  keudroe, ka  taduek  Raja

Ka  tamat gayam. Awuek Bak jaroe

Mantoeng lam duek troe, Rakyat  jeulata

Padahai  jamuen, Biat  saboeh  roe

Sumpah geutanyoe, koen meunan cara

Dalam Meuseujid , meulhoek lhoek  jaroe

Qur’an bak jaroe, Sumpah  tabaca

Bandum keu rakyat, peujuang nanggroe

Koen  maseng keudroe, Tamita  kaya

Koen keu jabatan, Mita  kaya  droe

Keu Rakyat Nanggroe, beu  ek seujahtra

Jinoe  meubalek, ka bandum  keudroe

Sumpah saboeh  roe, teu  ingat  hana

Biat  ngoen sumpah ,  jinoe ka  tuwoe,

Tapreh  Nibak po, geupeutroen bala

Yang peugoet  tape, juet beurangkasoe

Yang peugoet Ragoe, susah  tamita

Neubri Ya Allah, bek troek ban lumpoe
Aceh lhe sagoe, neubri seujahtra

Pilkada kalhueh, Gubernur ka meusoe
Aceh lhe sagoe, meuhoe taneuk ba
Hoe taneuk intah, nanggroe seuramoe
Bak Allah sidroe, tamohon doa

Neubri  Tuhanku, hajat beusampoe
Nanggroe  seuramoe, neubri bahgia
Neubri beu aman, bek sampe kasyoe
Bek troek  ban lumpoe, e ya Rabbana.
(Banda Aceh,  15  Nopember  2013 )