“ CIRI CIRI AHLI NURAKA “

  Oleh  : SULAIMAN.A.GANI,

============================

Alhamdulillah, Loen pujoe Allah

Raseuki mudah, sehat Anggota

Tuboeh loen mangat, pikiran loen glah

Hajat loen kisah, Saboeh  Mustika

Seulawuet saleum keu Rasulullah

Bandum sahabah, deungan keluarga

Nabi yang akhe, utusan Allah

Yang ba Risalah, ban sigoem donya

Assalammua’laikoem, Warahmatullah

Saleum sipatah, bandum loen sapa

Keu bandum wareh, ummi ngoen Ayah

Dalam wilayah, propinsi Dista

Samboet saleum loen, Rakan meutuah

Kheundak bak Allah, ka meunoe kada

Sira loen duek duek, pikiran leumah

Qur’an loen peuhah, loen puphoem makna

Surat Al A'raf  (179), rakan meutuah

Hajat loen peugah, hareutoe  makna

Kiban meukeusud, Allah neupeugah

Loen ci peujeulah, seun seun sibanja

Supaya muphoem, mangat bek salah

Uloen seuleuah, loen ci boeh  makna

Ahli Nuraka , Neukhuen  le Allah

Jahannam neukeubah, Asoe lhe tanda

Na  lhe boeh Ciri , Tanda geupeugah

Surat Al -A'raf ,  , neuci bilueng sa

Ciri yang keuphoen, neukhuen le Allah

Hate  geubri  sah, tan  dipeuguna

Kupue sit Hate, geubri le  Allah

Meutan faedah, Han tapeuguna

Han tatem puphoem, nyan Ayat Allah

Laloe ngoen bobah, peuseutoet donya

Ciri keu dua, Tanda geupeugah

Mata  bri Allah, Tan tapeuguna

Kupue sit mata, geubri le Allah

Meunyoe han leumah, Tanda kuasa

 Nyan tanda tanda, kekuasaan Allah

Rakan meutuah, Allah yue  baca

Bek sampe tanyoe,  tuwoe keu Allah

Dudoe neukeubah,  Ahli  Nuraka

Ciri  yang keulhee, Meunoe ban ulah

Neukhuen le  Allah, meunoe ban  tanda

Geubri geuliyueng, Tanyoe le  Allah

Rakan meutuah, han dipeuguna

Han tatem deungoe, seruan Allah

Laloe ngoen bobah, peuseutoet donya

Kupue Geuliyueng, geubri dua blah

Keu Ayat Allah, peuduli  hana

Meuka keuh habeh, tanda geupeugah

Surat Al- A'raf , loen surah makna

Meulhee boeh tanda, kalhueh loen peugah

Dudoe geukeubah, Asoe  Nuraka

Meunyoe  na salah, loen lake meuah

Ampon bak Allah, keudeh loen pinta

Kareuna  uloen, koen anuek Dayah

Rakan  metuah, dan koen pujangga

( Tgk Diyueb Bruek, 3  Nopember 2013 )

 

Ciri ahli neraka.
================
"Dan sesungguhnya Kami jadikan untuk (isi neraka Jahannam) kebanyakan dari jin dan manusia, mereka mempunyai hati, tetapi tidak dipergunakannya untuk memahami (ayat-ayat Allah) dan mereka mempunyai mata (tetapi) tidak dipergunakannya untuk melihat (tanda-tanda kekuasaan Allah), dan mereka mempunyai telinga (tetapi) tidak dipergunakannya untuk mendengar (ayat-ayat Allah). Mereka itu sebagai binatang ternak, bahkan mereka lebih sesat lagi. Mereka itulah orang-orang yang lalai."(Al A'raf : 179)
=================================================================