“ ALAM PEUDUENG “

========================

Deungon Bismillah, lon lake meuah
lon takot leupah, na salah haba

Ulang seujarah, ,rakan meutuah
Aceh lon  kisah ,nangroe mulia

Meuphon that teudong, nangroe Peureulak
Dudo meuhalak, nanggroe Samudra
Lam ruweungnyan ,na nanggroe Pidie
Dibineh pasie, na nanggroe Daya

Keurajeun Aceh, teuka 'oh dudo
Luah that nanggro ,ube na nyang ka
Teumpat sulotan ,Aceh lhe sagoe
Tanoh Gayo ,di nanggroe antara

Siblah Timu ,na nanggroe Pidie
Meuriti troh, u Samalanga
Abeh Pase, leumah Peureulak
Kuasa meuhalak, u Teuming teuma

Siblah Barat, na nanggroe Teunom
Teumpat geu tanom, meuh ngon suasa
Abeh Meulaboh ,Na Kuala Batee
Nanggroe ji the, na Leube Dapha

Abeh Trumon, na nanggro Singke
Teumpat lahe, Syiah Kuala
Meunan keuh rakan, keurajeun Aceh
Ji teupeu leubeh, di selat Malaka

Dari Del,  hingga Asahan
Hana so lawan, wahe syedara
Hansep Keudah,  meutamah pahang
Nanggroe Minang, Aceh Kuasa

Nyan hikayat,  masa jameun
Masa keurajeun,  nanggroe mulia
Masa peumimpin,  na akai budo
Masa nanggroe, kong kaom ulama

Wate masa nyan, na Alam Peudeung
Mirah meulinteung ,si panyang ija
Bak teungoh alam,  na sikrak peudeung
Nyang teugah linteun,  mara bahaya

Teuma jino , Aceh ka ubiet
Leuh keunong gapiet , kaphe Beulanda
Jino Aceh , gadoh keurajeun
Kon lage jameun , cukop kuasa

Jino Aceh , kon payong panji
Leuh jeut , keu abdi Indonesia
Meunan keuh tamse, rakan meutuah
Bek salah langkah,  pasai bendera

Bendera Aceh,  cit Alam Peudeung
Han so linteung , di dalam donya
Bek gabuek tanyo , ngon pasai lambang
Buet nyan reumbang , amai mulia

Pue guna lambing,  meunyoe tan na aso
Akai budo , nyang sampurna
Bek bandum pike , keu pasai lambang
Han so peutimang,  ra'yat nyang papa

Lon lake aduen , adoe meutuah
Beu jeut ta teugah , awak KPA
Meung na salah,  beu ta tem ta peugah
Deungon hikmah,  budo bahasa

Meunan keuh tanda,  rakan meutuah
Hana payah , ta meu syedara
Bek sampo rakan , jak salah langkah
Rakyat susah,  hanjeut meu-mita

Haba keuneuleuh,  dari lon tuan
Jak tanyo rakan,  simpan lam dada

Ta simpan beukong,  nyang alam peudeung
Keu alat linteung ,kaom durhaka

‎~HIKAYAT UMPUENG KEUMUTO~

‎   Oleh : T.A.SAKTI

========================================
Bacut ta peugah,  kisah keumuto
Binatang bako , leupah that bisa
Meu’en toe ngon jih , bek peuko-peuko
Meung sampe jilho , saket leupah jra

Bak bungoeng kayee,  kayem jipopo
Sinan keumuto,  rame meudoda
Bak jantong pisang , kadang ji meulho
Sabab teugeuso : sihat ngon teuga

Kadang bineh mon , teuka keumuto
Kayem meusigo,  musem khueng raya
Keumuto ka grah , ie tan pat cawo
Keu aneuk -cuco , ie dijak mita

Kadang tumpoek broih dijak ceumeulho
Jimita keudo makanan pat na
Bak sisek eungkot sinan jipopo
Soe nyang teugeuso keumong keupala

Akai tan jeungkat memang keumuto
Asai bek tako peukaru mula
Maseng lam buet droe bek meuchokalo
Sajan keumuto hanjeuet keumara

‘Oh watee malam bandum meusaho
Jiwoe keumuto u rumoh tangga
Bak cabeueng kayee umpung keumuto
Tan beu-o beu-o peuget bersama

Phon-phon takalon naban ek malo
Umpung keumuto mula pertama
Han jan takalon silap ka tuwo
Umpung keumuto ka ube tima

Kayem aneukmiet teugeuso-geuso
Umpung keumuto ka ji geulawa
Jirhom ngon kayee-batee jipeupo
Umpung keumuto anco ban sira

 

‘Oh lheueh jitagu jiplueng ban muto
Keumuto bre-bro teubiet uluwa
Pasukan siap ngon mata seso
Beungeh keumuto deundam meumbara

 

Aneukmiet tagu jeuoh tan meuho
Bah that keumuto hekpo jak mita
Dendam goh puleh meugareh keudo
Soe kheundak bak Po ureueng nyan rasa!!

Ureueng woe diblang ban lheueh ceumeulho
Dikap keumuto nibak keupala
Aneuk sikula jak-woe meusigo
Dum mieng ka baso keumuto raba

Bak woe kuliah singgah padum ho
Sinan keumuto dum rusak-luka
Laju dipagap dikap meuranjo
Keumong maup’o-p’o ka reuh’op muka

Peue nyang meudiyeueng dipucrok dum ho
Beungeh keumuto cit gohlom reuda
Kameng ngon leumo nyang keunan ke-ko
Kadang sampe klo keumuto seuba

Ureueng tan salah habeh jiseudo
Paleh keumuto meunye ka murka
Aneukmiet nyang rhom hantom jituho
Gob dum abeh klo bak jih tueng bila

Uleh seubab nyan beuget tahiro
Umpung keumuto bek toe ngen gata
Yoh mantong ubit umpung tagawo
Meung sampe ubo lethat bahaya

Toe teumpat umum umpama toko
Atau meusaho rumoh sikula
Gedong kuliah dan dayah GoGo
Umpung keumuto sinan han jeuet na

Sabab disinan dum ureueng seso
Meubloe bak toko dan jak sikula
Peuelom disinan dum ureueng bako
Calon dokeuto dengon ulama

Nyang jeuet keu bala hansoe tem hiro
Bah pih hai Dapo maseng bidang na
Na Kebersihan, ruang dum kuto
Miseue hai Cutpo ruang meungaja!!

 

 Satpam leungkap that dum seubo-seubo

Udep meuho-ho soe angkat hana
Maka seubab nyan ji teuka beu-o
Umpung keumuto geushiro hana

Hansoe peurintah hanasoe seudo!!
Nyan pasai beu-o maken meuganda
Hansoe tem lapor takot han hiro
Pimpinan beu-o hantom geuronda

Leupah that saket dikap keumuto
Kalheueh duwa go luntuwan rasa
Meusoe dicatok ngon rame dilho
Kadang nibak Po ajai ka teuka

Dikap sa-duwa ubat ngen hiro
Neumita Cutpo boh Me nyang tuha
Neuplah aneuk Me tipek meuranjo
Dipiep dum keudo ubena bisa!!!
(By: T.A. SAKTI)

“ CINTA DISEUTOET KEUCEWA “

   OLEH : SULAIMAN.A.GANI

=====================================

Assalamu’alaikom, tangloeng bungoeng jroet

Gajah jimeuroet, oen capa paya

Cinta lon jameun, ka jicoek le goeb

Rata singpang roet, kabeh lon mita

 

Riyeuk meuguloeng , di bineh laot
Angen Peubapoet , geulumbang raya
Hate ngoen jantoeng , bak sang karap rhoet
Tan le  meubaloet , Gaseh Seutia

Cinta yang suci , yang ka u  likot
Mandum ka teutop , bacut tanle na
Gaseh ngoen sayang,  awai teupawoet
Jinoe ka seupoet , cinta ka sirna

Dinda yang manja , leumah ngoen leumboet
Cinta tabaloet, ujoeng keucewa
Gata  yang lake,  hubungan tatoep
Ngat tabaloet,  cinta  meudua

Takoeh geurundong , tagloeng  jeuneurop
Pageu tapeugoet,  tapula lada
Teungeuh piyoeh hek,  lon preh uroe coet
Lon cuba peugoet pantoen meucinta

Beureujuek bale,  di coeng bak uroet
Tiong seumeutoet , dicoeng meuriya
Keu ulon tuan , bacut lon ceukoet
Masa lon meuwoet , degoen dek rika

Di adek  rika , wajah meusaloep
Bibi leupah goet , sang putroe kaca
Taeu di  hidom , mancong Meukeumboeb
Punggoeng meucindoet, lagei marsyanda

Oh lon peurati , jaroe lon kenkoet
Gaki ka teutoep , hana teurasa
Oh ban jiteugoer,  ulon teuganchoet
Lagei lam filem my heart,  dikamoe dua

Tapi that sayang,  lada ka jireot
Pageu pih jiloep,  le kameng muda
Ulon teu tahee,  nibak babah roet
Gaki sang reukoet , hantroeh lon gisa

Sedia payah lon , tambak leuhoep
Long gleung jeuneuroep , lon pageu tanda
Ban jeut keu atra , kagop jak rampoet
Soe yg han meuhoep,  lageinyan cara

Rabbineh ateung , na keubeu meuroet
Naleung leumpah goet,  ijo that muda
Cinta meucinta,  tapike beugoet
Bek sampe jiseutoet,  deugoen kecewa

( Tgk Diyueb Bruek  30/03/2011 )

“ UMPAMA SEDAN “

   OLEH : SULAIMAN.A.GANI

===================================

Assalammua’laikom, tangloeng jeumeulang

Haba lon karang, dua  lhee banja

Dara lawet nyoe, meuleupah sayang

Le jatoeh korban, keunoeng perkosa

Seubab salah droe, juet moto rental

Moto sewaan, pengangkoet  sewa

Moto ngoen urueng, cukop sipadan

Ka jiboeh reusam, jituka kada

Dum Anuek dara , umpama sedan,
Untuk kendaraan , kaum pemuda,
Meusoe nyang kaloen,  sangat menarek,
Meusoe nyeng tem ek,  han payah sewa.

Oh jisoek luweu made,  in england,
Pasoe udalam , bajee cheng chong wa
Oh jisoek bajee , made in jeupang,
Meusoe nyang pandang,  payah istaugfa.

Oh malam minggu, ta eu  bak jalan,
Teubiet poh lapan,  jiwoe poh dua,
Poma ngoen ayah , hate that seunang,
Seubab si inoeng,  kana soe ba ba,

Oh beungoh uroe , peugoet tarek-an,
Ladom u ladoeng , ladoem u lhoknga,
Geunap lhee buleun,  peugoet tarek-an,
Peutamoeng gudang , geujak pareksa.

Oeh ban jikaloen , le teknis gudang,
Pelak ka reunggang,  meusen ka cupa,
Seulende ka roe, kasoeh geureudang
Ta eu bungoeng bhan, luroeh meubura
 

Taloe  rem putoeh, keunepot ka bloeng
Dak tajok mantoeng, hana  soe  hawa.

Meunan keuh tamse, rawe lon peudoeng

Moto ka bodoeng, surat jih hana

Ulon peu ingat, bacut peuneusan

Keu bandum rakan, tuha ngoen muda

Beugoet jaga droe, tanyoe  iseulam

Bek tapeusaban, ngoen awak lua

Budaya kafe, sit meunan macam

Budaya Islam, kon meunan cara

Beuna tatakoet, keu azueb tuhan

Uroe komdian, tamoeng nuraka

( Tgk Diyueb Bruek, 25/07/2012 )

 

” JAGA AMANA H“

Oleh : SULAIMAN.A.GANI.

==================================

Rahman ngoen rahim, sifuet di Allah

Nikmat neulimpah, keunoe u Donya

Qadha ngoen kada, bak sidroe Allah

Hana hak bantah, geutanyoe  haba

Meugrak teukeudi, neubri lon le Allah

Saboeh Hidayah, keu lon geuyue ba

Sira lon duek duek, pikiran  teuhah

Tuleh naseukah, peu ingat  Hamba

Ulon bri judul, jaga  Amanah

Ummi ngoen Ayah, jaga  Anuekda

Kareuna anuek, nyan pih  Amanah

Beugoet neupapah, neusadu  bawa

Meunyoe roeh anuek, jipubuet  salah

Meuhat ma ngoen yah, tanggoeng  dosa

Meunan meuteume, di dalam  surah

Di Rasulullah, meunan meu Sabda

Hadis janjongan, Rasul po tallah

Meunoe ban ulah, ulon calitra

Kareuna anuek, jipubuet  salah

Meu  ma deungoen yah,tamoeng nuraka

Na sidro Aneuk, rakan meutuah
Peuritah Allah , pasoe  nuraka.

Ka juhuet sifuet, jipubue salah

Peurintah Allah, han dikeurija

Le malaikat, neucoek le  bagah

Lage peurintah, Allah  ta’ala

Dalam nuraka, neulanboeng bagah

Meunan keu ulah, malaikat keurija

Teuma Anueknyan, lake bak Allah

Hajat jipeugah, seubab kareuna

Meupakon di jih, jipubuet  salah

Le ngoen Ayah, peurunoe hana

Oh kalhueh izin, ka nibak  Allah

Anuek seumeugah, seun seun sibanja

Waya Rabbana, Tuhan ulon sah

Yang po Amanah, u atueh  hamba

Meuseubab dilon, meuroeh buet salah

Seubab ma ngoen yah, peurunoe hana

Hantom na geuyue, dilon ibadah

Hantom peurintah, bak buet Agama

Umi lon lale , minta nafakah
Teuma di ayah, sibuk keurija.
Sehingga ulon , hantom geupapah

Hantom geupegah, eleume  agama

Meunyoe hanjuet droe, wajeb peu upah

Keudeh u dayah, geujak joek  ulonnyoe

Mangat lon turi, larang ngoen teugah

Beutoi ngoen salah, e ya  rabbana

Meuka Seubabnyan, wahe ya Allah
Ulonnyoe salah, seubab  yah ngoen Ma.
Meutroen Fireuman, ka nibak Allah
Malaikah  sah, suroeh   Rabbana.

Meuhoe  ureug syik, yang tan amanah
Po ma ngoen Ayah,  Asoe Syuruga
Laju neujeumpuet , le  malek Zabaniyah.
Po ma ngoen Ayah , yg  na lam syurga.

Masa lam donya, hana  amanah
Suruhan Allah , meuhadap  sigra
Meutroen fireuman, yoeynyan bak Allah
Amalan  ayah, tuka ngoen aneukda.

Yoehnyan geutuka, sigra le Allah
Peutamoeng Ayah, Asoe  Nuraka

Anuek Syuruga ,tamoeng le  bagah

Meunan keuh ulah, rawi ulama

================================

TAPEULARA SEUDEKAH

Oleh : SULAIMAN.A.GANI
=====================================
Assalammua’laikom, Saleum lon sapa
Bandum saudara, neuseu ot bagah
Saleum ulon bri, tanda mulia
Mudi ngoen muda, yang katroek langkah

Hajat lon peugah, saboeh mustika
Cara peulara, akan seudeukah
Bek Oh lhueh neubri, juet sia sia
Hana fahala, neubri le Allah

Meunoe ban bagoe, lon peugah cara
Beuneupeulara, akan seudeukah
Ngat troek maksud, meuteume fahla
Allah ta’ala, dodoe yang balah

Sibeurangkasoe, jibri keu ria
Hana fahala, akan seudeukah
Makanyan seubab, beuneupeulara
Mangat na fahla, neubri seudeukah

Limoeng peukara, Harus beutapeulara
Wate ka tabri, akan seudeukah
Yang phoen tajaga, ria lam hate
Wate ka tabri , akan seudeukah

Bek na teusureh, lam sanubari
Bah loen peulahe, bah goeb kheun murah
Seudapat mungken, beutaseumbunyi
Supaya hase, sinan ikeulas

Seubabnyan sampe, di alem sufi
Ngoen tersembunyi, geubri seudekah
Sampe geumita , alem yang fakir
Yang ek sendiri, yang teungeut dasyah

Geuboeh seudeukah, lam balum kafir
Ngat bek jituri , meunan kaidah
Ladoem yang buta, geumita fakir
Ngat bek jituri, yang bri seudekah

Meunan keuh macam , yang ka terjadi
Di alem sufi , tangieng seujarah
Dalil disinan , firmana illahi
Baca hai akhi , lafai dilalah

“Wain tukhfuha watuk tuhal fukara wahuwal khairul lakum “

Seungkira tasoem , akan seudeukah
Watee taseurah , akan si fakir
Yang meunan bangoen, neukheun le Allah
Yang meunan ulah, leubeh Auwali

Dua tajaga , dalam seudeukah
Bek roeh tapeugah , yang meunyakiti
Kareuna seubab, dua boeh surah
Bateu seudeukah, fala han neubri

Contoh ibarat, bacut loen peugah
Ngat muphoem surah , bek roeh terjadi
Oh lheuh tatuloeng, tabri seudeukah
Lheuhnyan tahujjah, laju sifakir

Sangkira kon na , loen bri seudeukah
Jitheun deuk kasah, aneuk isteri
Meunan keuh bangoen, tapeugah peugah
Yang jeut keu surah , ka menyakiti

“Ya aiyuhallazi na amanu latubtilu sadaqatikum bil manni

wal azakallazi yufiku malahuria annas”
Wahe saudara , yang ka meu iman
Yang iman peunoeh , di dalam hate
Bek tapeubateu, akan seudeukah

Dengoen tapeugah , dan meunyakiti
Meudan loem ureueng, yang bri seudeukah
Seubab jipeudeuh , nibak insani
Keu lhee (3) tajaga , dalam seudeukah

Yang leubeh indah, harta yang tabri
Barang tagaseh, nyan keuh taseurah
Wate troek langkah , sidroe sidroe fakir
Dalil disinan, fireuman Allah

Baca meutuwah, Taboeh areuti
“ Lantana lulbirra hatta tumfiku mimma tuhibbu”

Han loem tercapai , neukheun le Allah
Keubajikan sah , seukali kali
Seuhingga gata , tameuseudeukah
Yang leubeh indah, harta yang suci

Barang tagaseh, nyan keuh taseurah
Supaya limpah , fahla tuhan bri
Tapi ditanyoe, tameuseudeukah
Wate troek langkah, sidroe droe fakir

Tangieng lam kantoeng, haroeh peng bicah
Meunyoe peng reutoeh , hana roeh tabri
Seubab tacinta, keupeng yang bicah
Talake meu’ah, laju bak fakir

Keu peut (4) tajaga , tameuseudekah
Yang na ,asalah agama rabbi
Mesuseujid jamik, atau u dayah
Keunan seudeukah, patoet that tabri

Limoeng tajaga, dalam seudeukah
Fakir pih saleh , alem mutakin
Beujeut meuneuloeng , bak buet ibadah
Bak pujoe Allah , bak pujoe rabbi

Lomoeng peukara, habeh loen peugah
Dalam seudeukah, beutapeulara
Meunan muphoem lon, didalam surah
Kalhueh lon peugah, untuk sikada
( Tgk Diyueb Bruek 02/07/2011

FADHILAH BISMILLAH RIWAYAT NABI ISA

=====================================

 Oleh  : SULAIMAN.A.GANI

======================================

Meukru seumangat, Rahmat meulimpah

Sit Sidroe Allah, Nikmat geutabu

Ngoen Rahman rahim, sifuet di Allah

Keunoe neulimpah, Rahmat Tuhanku

Seulawuet saleum, keu Rasulullah

Utusan Allah, barat ngoen timu

Rasul yang akhe, yang ba risalah

Keu hamba Allah, Bandum penjuru

Lhuehnyan saleum lon, neusamboet bagah

Ummi ngoen ayah, barat ngoen timu

Hajat lon susoen, saboeh naseukah

Fadhilah Bisminllah, hajat lon ramu

Kiban maksud , baca Bisminlah

Mupue  Faedah, Geubri  Tuhanku

Saboeh Riwayat, hajat lon peugah

Isa Ruhullah, neujak bak  kubu

Nibak si uroe , di rasulullah

Roeh neumeulangkah,  bak saboh kubu

Nibak kubunyan,  azeub meuleupah

Su um meuleupah,  lagee apue hu

Isa meuhajat , lakee bak allah

Neu mohon titah,  nibak tuhanku

E ya rabbana , neucuba peugah

Pue azeub leupah,  nyan asoe kubu

Yoehnyan firman,  nibak po tollah

Raya that salah,  masa dahulu

Masa lam donya,  raya that salah

Maka that sosah , dijih lam kubu

Ban isa deungoe,  meunan neupeugah

Beurangkat bagah,  hoe laen laju

Hingga padum treib,  lawet ka sudah

Isa ruhullah,  roet nan lom lalu

  

Bak kubu bunoe , neupiyoeh bagah

Le that ka ubah , neukalon laku

Azeub hana le,  bak dali leumah

Rahmat neutamah,  leupie lam kubu

Isa mohon lom,  yoeh nyan bak Allah

Rahmat meutamah,  jinoe lam kubu

Seubab aneuk cut , sidroe jikeubah

Jinoe pih sudah,  jih katroek umu

U bak teumpat beut , le ma jiseurah

Jinoe di dayah,  jijak bak tungku

Oh wate jikheun,  nama bismillah

Rahmat keu ayah,  meuwoe lam kubu

Ban Isa deungoe , meunan peuneugah

Isa  Ruhullah , Yoehnyan terharu

Nyan keuh fadhilah,  baca bismillah

Aneuk ta seurah,  jinoe bak tungku

Anuek tajak joek, keudeh u dayah

Ngat na faedah, Ayah ngoen ibu

Ngat na soe baca, kalam Bisminlah

Nikmat geulimpah, peutroen lam Kubu

Meumada ohnoe, haba lon kisah

Isa  Ruhullah, neujak bak kubu

Rayoek that fahla, baca Bisminllah

Neubri le Allah, peutroen lam kubu

( Tgk  Diyueb Bruek )