Pages


Minggu, 01 Juni 2014

“ RUKON SEUMBAHYANG PADUM GEUBAGI “



     Oleh  : Sulaiman. A. Gani
===========================
Alhamdulillah, lon pujoe Rabbi
Yang maha suci, Azawajalla
Yang peuna peutan, yang bri raseuki
Bandum buet Rabbi, yang laen sit  tan

Seulawuet saleum, ohlhuehnyan lagi
Pang ule Nabi, Rasul Mustafa
Yang bri Syafaat, bak  ule titi
Liwa Ul-Hamdi, Payoeng maulana

Samboet saleum lon, Sulaiman gani
Yang susoen rawi, panton lam rika
Hajat lon tanyoeng, jawaban neubri
Padum geubagi, rukon seumbahyang

Lhe blah peukara, padum geubagi
Sifuet Bak Rambbi, peutaklok keunan
Meupue  pue rukon, bak tiep tiep bagi
Ngoen sifuet Rabbi , meupue  geupeunan

Meunyan keuh soal, jawaban neubri
Neutuloeng bagi , bak tiep tiep jeumba
Meunyoe tan muphoem, cara neubagi
Ngoen Sifuet rabbi, jitamoeng keunan

Sideh dalam Blog, jawaban lon bri
Keudeh Hai Akhi, neutuloeng mita
Disinan  leungkap, kalhueh lon  bagi
Ngoen sifuet Rabbi, bandum disinan

Neutamoeng lam blog, Sulaiman Gani
Alamat lon bri,  meunoe ban nama

Meu  Insya Allah, ngoen tuloeng Rabbi
Kalhueh lon bagi, meunuroet  jeumba
Meumada ohnoe, haba lon rawi
Dalam blog neuci, keudeh pareksa
( Tgk  Diyueb Bruek, 16/06/2013 )
Jawaban :
Alhamdulillah , ngoen Tuloeng Rabbi
Jawaban lon bri, mangat sempurna
Rukon seumbahyang, lon nuek peuturi
Supaya meuri,  lhee blah perkara

Yoh goeh lon peugah, padum geubagi
Yoeh lon peuri, Sifuet  Rabbana
Pue pue  Jitakloek, lam tiep tiep bagi
Supaya meuri, bek meusoem punca

Rukon Seumbahyang, ulon peuturi
Lhe blah hai akhi, neuci bileung sa
Pereutama niet,  di dalam hati
Peukeukal diri,  seumah Rabbana

Rukon keudua,  tadoeng berdiri
Syarat meudali , yang  na kuasa
Rukon  yang keulhe,  Geukhuen takeubi
Peukong lam hati,  niet meusahaja

Baca fatihah rukon yang keupeut,,
Ta baca beujeut,  Tajuwit  beuna
Lafai ngoen  huruf , beu pah  makhreuj
Panyang ngon paneuk,  bek sagai lupa,

Rukon keu limong Ruku' hai rakan
Badan ngon pinggang,  saree keupala,
dak  jeut beu rata , tulang beulakang
Bek sembarangan , ban bungkok raga

Keunam  I'tidal , teugak kembali
Tanyoe  berdiri,  lage seumula
Didalam kitab geu kheun transisi
Yoeh goh he akhi,  sujud bak tika,

Keu tujoh Sujud,  hai rakan sahbat
Ta tikeui beu jab , tika mushalla
Anggota sujud bek na , meujungkat
Ta peutroeh beukrab , bandum u tika

Duduk antara , rukon keu lapan
Nyan perseulangan , sujud keu dua
Taduek tasyaheud , yang keu sembilan
Beu pah hai taulan,  beu samporeuna

Teuma keu siploeh,  tabaca Tahyeut
Ta baca beujeut,  makhreuj seumpurna
Tasyaheud akhe , lage yang ta beut,
Beu pah i'tikeut,  bek salah kira,,

Baca Seulaweut,  rukon keu siblah
Ta lafai beupah , untuk saidina
Ta ucap Seleum , yang keu Dua blah
Teurtib keu Lhee blah,  habeh perkara,

“ Geubagi 
=========
Nyan Rukon lhe blah, meulhee geubagi
Deungoe hai Akhi, seun seun sibanja
Peureuta Maphoen, Geupeunan Kalbi
Meunyan buet Hati, taniet le gata

Sinan Rukon  Niet, di dalam Kalbi
Laen hai akhi, disinan hana
Disinan Ilmu, Sifuet di Rabbi
Bandum neutukri, pue qasad Hamba

Di dalam hate, yang tersembunyi
Allah neutukri, taniet le gata
Meukon Ilmu, Sifuet di Rabbi
Pane  neutukri, cukop rasia

Meunyang keu dua, geupeunan Kauli
Lidah hai akhi, punya keurija
Limoeng boeh Rukon, Tamoeng lam  Kauli
Geubangsa bagi, bak tiep tiep jeumba

Peureuta maphoen, Rukon  Takeubi
Dua hai Akhi, Fatihah Gata
Keu lhe tabaca, Bak taduek tahyuet
Teuma yang keu peut, Seulawuet Gata

Keu limoeng saleum, beu tungku turi
Tamoeng lam Kauli, limoeng boh kana
Disinan Sama’k, sifuet di Rabbi
Allah hai Akhi, Geudeungoe Gata

Pue yang baca, lam rukon kauli
Deungoe di Rabbi, yang lidah baca
Meukon ngoen sama’k, sfuet di Rabbi
Ka takhuen tuli, Allah  ta’ala

Teuman yang keu lhe, geupeunan Fikli
Sinan Areuti, Tuboeh  keurija
Tujoeh boeh rukon, Tamoeng lam Fikli
Deungoen lon khuen, neuci bilueng sa

Yang keuphoen Tadoeng, Badan beuteupat
Ta hadap Kiblat, timang ngoen dada
Keudua Ruku’k, keu lhe I’tidal
Meuwoe bak Asai, Tadoeng yoeh mula

Keupuet Sujud, Perbuatan Badan
Limoeng hai Rakan, Taduk  antara
Taduek lam tayuet, teuma yang keunam
Tujoeh hai rakan, teureutib beuna

Di dalam Fikli, sifuet di Tuhan
Meusifuet Basar, Allah  taa’la
Lam supoet  Buta , Tadoeng seumbahyang
Allah neupandang, neukalon gata

Meukon ngoen Basar, Sifuet di Tuhan
Handueh neupandang, lam supoet Buta
Handueh Neukalon, gata seumbahyang
Maka keu Tuhan, Ta tuduh  Buta

Ban lhe blah rukon, dalam seumbahyang
Kalhueh lon peutrang, ka sampureuna
Saboeh lam kalbi, meuniet disinan
 Limoeng hai rakan, lam Kauli  nama

Tujoeh lam Fikli, jitamoeng keunan
Jumlah hai rakan, meulhe blah kana
Meulhe boeh Sifuet, nyan milek Tuhan
Jitamoeng keunan, neuci bilueng sa

Yang keuphoen, Ilmu sifuet di Tuhan
Allah neutuban, meunit di gata
Keudua Samak , Sifuet di Tuhan
Allah neutuban, yang lidah baca

Yang keu lhe, Basar Sifuet di Tuhan
Allah neutuban, Neukalon Gata
Lam supoet Buta, lam teungoeh malam
Allah neupadang, dueh  neu eu gata
 
Meuka keuh habeh, lon bri jawaban
Rukon Seumbahyang, Geubagi bangsa
Ngoen Sifuet Allah, jitamoeng keunan
Meunyoe salahan, peubeutoi sigra
( Tgk Diyueb Bruek, 16/06/2013 )


Komentar FB :