Pages


Kamis, 28 Februari 2013

FACE BOOK

Assalammua’laikom, saleum lon sipruek 
Saleum Face Book, lam donya Maya
Anggota Grup Panton, Tgk Diyueb bruek
Saleum lon sipruek, tanda Mulia

Samboet saleum lon, sion sineujuek
Laloe ngoen face book, ulon calitra
Uroe ngoen malam, sabe lam sibuk
Loptop Geugusuek, Gogle geumita

Sibuungong meulu, lon boh dalam bruek,
Ka ulon peuduek , di atueh meja
Nibak jameun jinoe, paloe ngoen gabuek,
Laloe ngon fecebok , tuha ngoen muda

Ladom lam waroeng, disinan geuduek,
Laloe Facebook, Troek malam jula
Laloe ngoen loptop, han geuthe sijuek
Yang ladom sibuk , hp Nokia

Ladom BBM, sabe lam sibuk
HP geugusuk, kirem beurita
Di Anuek muda, pih laen gabuek
Ceting ngoen Facebook, panton meucinta

Ladom di sampeng, sinan jipeuduek
Sira meu facebook, jaroe meuraba
Sira jeip kopi, jaroe meugusuek
Yang ladom gabuek, laloe meuwa wa

Tinggai seumbahyang, laloe ngon facebook
Sidumnan sibuek, ngoen donya Maya
Sang hanle mate, geusak lam uruek
Malaikat juthuek, dalam nuraka

Peuseutoet donya, laloe ngoen facebook
Bek sampe sibuk, seumbahnyang hana
Tuwoe sikula, gadoeh facebook
Oh dudoe sibuk, meunyeusai teuka

Urueng syik gata, di gampoeng sibuk
Mita keu anuek, geubloeh juet paya
Di Anuek laloe, ceting facebook
Oh dudoe sibuk, oh pruet ka raya
Baro ta the droe, seubab facebook
Nyan baro sibuk, lakoe teuh hana
Lakoe ta sewa, cinta facebook
Nyan baro sibuk, male ngoen Donya
( Tgk Diyueb Bruek,23/02/2013 )

”HABA PEU INGAT-5”

Na keujadian , laen seujarah
Masa khalifah, abu bakari
Oh kaleuh wafeut , di rasulullah
Neumat peurintah, geunantoe nabi

Nibak si uroe, gobnyan meulangkah
Dengoen jamaah , bak ureung mate 
Oh ban sare troek, ngoen cara ringkas
Seumanoe bagah , gafan ka hase

Yohnyan geupeutroen , akan jeunazah
Ubak leun rumoeh, le karong wali
Untuk geupubuet, shalat jeunazah
Uleh jamaah, sahabat nabi

Bak watee geudoeng , lam seuh jamaah
Geukalon leumah , nibak simate
Gafan meugrak grak , geunta sileupah
Pareksa bagah , ngoen gundah hatee

Oh geupeuriksa, geukalon leumah
Uleu na saboh, hebat bukon le
Jigrueb bak tague, manyet syakuwah
Asoe jipajoh, darah ka ile

Yohnyan sahabat, khalifatullah
Geu keuneuk bunuh, uleu beumate
Maka di uleu, ji cunggok bagah
Ucap syahadah , faseh bukonle

Oh lheuh di ucap, kalimah syahadah
Ubak khalifah, meunoe jikheun kri
Keupeu neupoh loen, wahai khalifah
Uloen tan salah , wahai habibi

Neubangket uloen, keunoe le allah
Azeub yang peudeh, keujih geuyoe bri
Mulai jinoe , sampoe kiamat
Jih geuyue laknat, oleh ilahi

Kareuna dijih , raya that salah
Disisi allah, tuhanku rabbi
Salah pertama, manyet syahkuwah
Jideungoe kasah , azan berbunyi

Kadeuh dideungoe, seruan allah
Jipoeh beurakah , han dipeuduli
Ubak jamaah , han jimeulangkah
Ngoen seubab nyankeuh , azeub geruyue bri

Salah keu dua , manyet syahkuwah
Zakeut han jiboh, fitrah han jibri
Salah yang keu lhee, yang that azimah
Disisi allah , tuhanku rabbi

Tutoe ulama, watee geupeugah
Nasehat keujih , han jipeuduli
Jitoep geuliyueng , ho laen langkah
Lom dipeujaeh , ngoen tutoe keuji

Adak jipateih, ban gobyan peugah
Han sit ditimoh, ija pupanji
Meunan di uleu , haba jipeugah
Ubak khalifah, abu bakari

Oh noe katamat, haba seujarah
Neucok neukeubah, pasoe lam hate
Supaya tanyoe, beule lam tabah
Tapujoe allah, bek syoek syoek sangka
( Tgk Diyueb Bruek/Sulaiman.A.Gani)26/02/2013

Komentar FB :