Pages


Kamis, 07 Maret 2013

"UAN" ( Majalah Kiprah )



  Oleh : SULAIMAN.A.GANI
================================
Alhamduliullah ,loen pujoe  tuhan
Yang peujeut alam, ban sigom donya
Yang peujeut langet, hana meutiang
Yang peujeut insan, dum  manusia

Seulaweut saleum, akan janjongan
Dum sekalian, sahbat saidina
Urueng peujuang, syiar iseulam
Uroe ngoen malam, pujoe rabbana

Assalamu`alaikom, jaroe lon layang
Keu bandum rakan, duson ngon kota
Sambot saleum lon,  sion karangan
Keu soal  uan,  uloen calitra

Ujian  akhe, geupeunan  uan
Cukop that sayang, lulus dum hana
Keubit that mutu, rendah hana ban
Pue salah rakan , neuci pareksa

Oleh seubabnyan, ka wahai rakan
Keu pendidikan, tapike beuna
Le para guru, beujeut  ingatan
Supaya uan, lulus semua

Aceh tadongkrak, lam pendidikan
Supaya saban , ngoen nanggroe lua
Aceh tapeugoet, lam pendidikan
Supaya  uan, hanjeut kendala

Tatingkat mutu, nyan pendidikan
Aceh darussalam, tamita cara
Kepala dinas , nyan pendidikan
Saboeh tatangan, yang cukoep raya

Le pak alamsyah, kalheuh geupeusan
Dua ribe nam, geutakoet raya
Seubab seureuntak, cara nasional
Ujian uan, sit sigoe saja

Peureule tapike, tabri dukungan
Bandum lapisan, ikoet seureuta
Tatingkat mutu, lam pendidikan
Tamita jalan , tapeugoet cara

Troek wali murid, bek keutinggalan
Badum lapisan, ikoet seureuta
Keu soal dana, hanjeut alasan
Keu pendidikan , jatah jih kana

Bek jeut keu kontra, masaalah  uan
Bek jeut alasan, tapeuna peuna
        mutu yang peunteng,beutatingkatkan
Keu pendidikan,  pike bersama

Bek jeut tsunami , saboeh alasan
Kana bantuan, rumoeh sikula
Jinoe bersatu, bandum hai rakan
Bek jeut le  uan, saboeh kendala

Ban kurikulum, yue ikoet rijang
Mangat seuragam, saboeh metoda
Seubab seureuntak, jipeugoet  uan
Jikirem soal, le meuntri pe ka

Bacut keu guru, wasiet peuneusan
Tumbuh kembangkan, nyan minat baca
Keu aneuk didik, neubri bacaan
Atau hai rakan, tamoeng pustaka

Meule meubaca, luah wawasan
Teuhah pikiran, teubuka mata
Le perbandingan,  jeut keu ingatan
Supaya  uan, bek jeut keundala

Yue tamoeng lam lab,peugoet cobaan
Neubri bimbingan, cara keurija
Unsur kimia, pakri ban macam
Adoek pakriban,  riaksi pue  na

Neujoek ngoen tugas, tiep peulajaran
Neuyue kerjakan, mangat biasa
Supaya caroeng, meule  latihan
Oh wate  uan, susah jih hana

Buku pegangan, neubagi rijang
Buku  bacaan , neubagi rata
Tiep peulajaran, neujoek bacaan
Neubri tambahan, tugas pustaka

Neujoek les supoet, untuk tambahan
Nyan saboeh jalan, les bak sikula
Tatingkat mutu, lam pendidikan
Oh wate  uan, eleume kana

Meumada ohnoe , haba loen peusan
Masaalah  uan,  uloen calitra
Meu`ah loen lake, akhirul kalam
Kadang bak kadang , na  salah haba

0 komentar:

Posting Komentar

Komentar FB :