“ Seukeudar Saran dan Rujukan Untuk Pemimpin

“ Seukeudar Saran dan Rujukan Untuk Pemimpin

Aceh yang akan Ukue ““Baroe kalheuh lon sajikan

“Doa Dan Harapan Anuek Nangroe”“Bak Uroenyoe

“ Ta atoe Donya Tabangun Nanggroe”

  Oleh : SULAIMAN.A.GANI

===========================================
Alhamdulilah Rahmat Meukatoe
Allah Lon Pujoe Sidroe Yang Esa
Seulaweut Saleum Oh Lheuhnyan Dudoe
Rasul Geutanyoe Saidil Ambiya

Keu Bandum Kawoem Agam Ngoen Binoe
Dua Blah Jaroe Ateuh Jeumala
Meukru Seumangat Rahmat Sinaroe
Ulon Hareutoe Sabda Saidina

Sabda Janjongan Nabi Geutanyoe
Neupeugah Meunoe Rasul Mustafa
Ta Atoe Donya Tabangun Nanggroe
Nabi Hareutoe Ngoen Peut Peukara

Yang Phoen Beu Ade Peumimpin Nanggroe
Dua Eleume Para Ulama
Ulama Yang Na di Dalam Nanggroe
Beugeuteim Pugoe Kawoem Juhala

Kawoem Yang Jahe Beugeupeurunoe
Yang Makroeh Geuyue Geutham Yang Mungkar
Uleh Peumimpin Yang Ade Bunoe
Di Dalam Hal Nyoe Ikoet Seureuta

Geupeudoeng Adat Hukoem Lam Nanggroe
Geu Ikat Buetnyoe Ngoen Bijaksana
Ureung Yang Langgar Beuthat Beurangsoe
Bagi Ureungnyoe Ganjaran Beuna

Geuhapus Judi Kropsi Lam Nanggroe
Rakyat Han Phang Phoe Aman Seujahtra
Bek Lage Jinoe Ta eu Jeut Sagoe
Kropsi Sang Bagoe Saboeh Budaya

Bak Bagi Jadup Neuci eu Keudroe
Bukoen Hai Adoe Lon Peuna – Peuna
Jatah Peungungsi Jipajoeh Keudroe
Konle Ban Bagoe Amanah Jiba

Tanle Amanah Peumimpin Nanggroe
Maka legenyoe Bala Tarasa
Teuma yang keu lhe Nabi Haruetoe
Ngoen Murah Jaroe Ureung Yang Kaya

Deungoen Murahan Ureung Kaya Nyoe
Hase Jroeh Nanggroe Rakyat Bahgia
Hase Tabungan Meumacam Bagoe
Meunasah Sagoe Bale P K.K

Pageu Meuturap Pancang Jih Beusoe
Kawat Meuduroe Tarek Seulingka
Ie Dalam Kulah Han Payah Pasoe
Ji Hisap Keudroe le Meusien Pompa

Apeu Leseutrek Jiplueng Lam Taloe
Rata Jeut Sagoe Meugantung Bola
Ngoen Seubab Murah Ureung Kaya Nyoe
Aman Lam Nanggroe Makmu Seujahtra

Teuma Yang Keupeut Nabi Hareutoe
Doa Sinaroe Bandum Fukhara
Han Geulhoem Kutoek Le Tuhan Sidroe
Seubab Fakirnyoe Sabe Meu Doa

Sangkira Hana Alem Ulama
Sunggoeh Binasa Bandum Sijahe
Sunggoeh Buet Maksiet Meuraja lela
Kareuna Hana Ureung Teugah Le

Sangkira Hana Murah Sikaya
Sunggoeh Binasa Bandum Sifakir
Hanle Soe Tuloeng Beuthat Seungsara
Kurueng Belanja Hana Le Soe Bri

Sangkira Hana Doa Fukhara
Sunggoeh Binasa Bandum si Jahe
Lam Tiep – tiep suntoek sabe troek bala
Sangkira hana doa sifakir

Sangkira hana ade umara
Sunggoeh binasa bandum teuh sare
Sunggoeh jipajoeh le manusia
Akan bangsanya seuteungoeh lagi

Lage jipajoeh Ion boeh umpama
Rimeueng ngoen singa kameng keubiri
Meunan muphoem Ion hadist saidina
Ban peut peukara kalheuh Ion peuri

( Tgk Diyueb Bruek/Sulaiman.A.Gani)