IE LAOT KA MIRAH

IE  LAOT KA  MIRAH

Oleh  : SULAIMAN.A.GANI

===================================

Na`uzubillah lindoeng bak  Allah

Alhamdulillah Haba lon mula

Seulaweut Saleum keu Rasulullah

Yang Ba Risalah Ban Sigoem Donya

Salama`laikoem   warahmatullah

Ummi ngoen Ayah Duson ngon Kota

Samboet saleum lon sion keureutah

Ie laot mirah  lon keuneuk rika

Kareuna Aceh banlheuh musibah

Neubri le Allah Tsunami Geumpa

Jinoe Ie laot Takalon Mirah

leh pue musibah kaneubri tanda

Neubri alamat  Ie laot Mirah

Aceh le salah  Buet Manusia

Saboh Teuguran Tanyoe Bak Allah

Neubri musibah Meuganda ganda

Tadeungo tutoeng Rata daerah

Dan lom geutamah ngon geubri bala

Puteing beuliong rumoh dum patah

Rata daerah ji ek ie raya

Tiep tiep geuneukbri  Bala le Allah

Teunte na salah Geutanyoe hamba

Le that tadeungo rata daerah

Seuramor meukkah masiet leupah na

Wate tabaca koran jipeugah

Aceh ka caprah lage Eropa

Yang pubuet maksiet hanle soe teugah

Dum Hamba Allah Maboek ngoen Donya

Meunyoe geutanyoe maksiet keu Allah

Ohna musibah bekroe ie mata

Seubab Acehnyoe han jitheun caprah

Bacut na salah ka geubri bala

Jinoe ie laot  takalon mirah

Dalam seujarah dile hantom na

Leh pue neuneukbri bala le Allah

Leh pue musibah akan troek teuka

E ya Tuhanku  Bala neupinah

Seuramoe meukkah beujeuoh mara

Neutunyoek jalan urueng yang salah

Gisa beubagah Taubat Nasuha

Di Aneuk Dara Aurat bek teuhah

Buet haram jadah bekle keurija

Bekle meurampok deungon meureupah

Seuramo meukah bekle buet  zina

Bekle na judideungon meumukah

Bekle roe darah ngon prang saudara

Syariat islam  bek tapeubeuah

Beu tapeumeugah Syiar Agama

Seuramo meukah tapuwoe tuwah

Lage seujarah Iskandar muda

Aceh lhe sagoe  nanggroe meutuah

Bek tapeucaprah hai neuk le gata

( Tgk. Diyueb Bruek )